Gustav Mahler

Dr Gustav Mahler (* 7. Juli 1860 z Kalischt, Böhme; † 18. Mai 1911 z Wien) isch en östriichische Komponist in dr Zit vo dr Belle Époque am Übergang vo dr Spootromantik zur Modärne gsi. Er isch nit nume eine vo de bedütendste Komponiste vo dr Spootromantik, sondern au eine vo de berüehmtiste Dirigänte vo sinere Zit und as Operediräkter e bedütende Reformer vom Muusigtheater. Dr Mahler isch e Schüeler vom Anton Bruckner gsi. 1897 isch er Kapällmeister, denn Diräkter vo dr Hofopere z Wien worde. Er isch vo 1907 bis 1909 au Dirigänt vo dr New Yorker Metropolitain Opera gsi.

Siis Wärk umfasst zäh Simfonie, vili Lieder drunder «Das Lied von der Erde» für Tenor, Alt und Orchester, d «Kindertotenlieder», «Des Knaben Wunderhorn» noch Text us dr Gedichtsammlig mit däm Ditel vom Clemens Brentano und Achim von Arnim und Orchesterlieder.